प्राध्यापकांसाठी उद्यम उद्योजकता बूट कॅम्पचे आयोजन…

सोलापूर- पुण्यश्लोक अहिल्यादेवी होळकर सोलापूर विद्यापीठातील उद्यम इनक्युबेशन सेंटरमार्फत आयोजित ‘उद्यम प्रेरणा केंद्र’ आणि प्राध्यापकांसाठी उद्यम इग्नाइट या पाच दिवसीय उद्योजकता बूट कॅम्पचे उद्घाटन कुलगुरू प्रा. डॉ. प्रकाश महानवर यांच्या हस्ते झाले. यावेळी वाधवाणी फाउंडेशनचे दयाकर मूर्ती, विशाल नायर तसेच प्र-कुलगुरू प्रा. लक्ष्मीकांत दामा, कुलसचिव योगिनी घारे, संचालक प्रा. विकास पाटील यांची प्रमुख उपस्थिती होती.

नवीन कल्पना आणि स्टार्टअप्सच्या संगोपनाचे प्रतीक असलेले तसेच उद्योग वाढीला चालना देण्यासाठी विद्यापीठाच्यावतीने हा नाविन्यपूर्ण उपक्रम राबविण्यात येत आहे. यावेळी बोलताना कुलगुरू प्रा. महानवर यांनी आजच्या अर्थव्यवस्थेत उद्योजकतेचे महत्त्व अधोरेखित केले. पुण्यश्लोक अहिल्यादेवी होळकर सोलापूर विद्यापीठाच्या अंतर्गत प्रत्येक संलग्न महाविद्यालयात उद्योजकतेला पाठिंबा देण्यासाठी उद्यम प्रेरणा केंद्राची स्थापना करण्यात आली आहे. तसेच नवीन उद्योजकांसाठी सतत मार्गदर्शन, संसाधने आणि नेटवर्किंग संधी यामुळे उपलब्ध होतील, असे त्यांनी सांगितले.

उद्यम उद्योजकता बूट कॅम्प दि. २७ ते ३१ जानेवारी २०२५ पर्यंत चालेल. विद्यार्थ्यांमधील उद्योजकीय प्रतिभेला जोपासण्यासाठी प्राध्यापकांना ज्ञान आणि साधनांनी सुसज्ज करण्यासाठी डिझाइन केले आहे. बूट कॅम्पमध्ये तज्ञांच्या नेतृत्वाखालील कार्यशाळा, प्रत्यक्ष व्यवसाय नियोजन सत्रे आणि नवोपक्रम आणि स्टार्टअप परिसंस्थांवर चर्चा होणार आहे. इनक्यूबेशन सेंटरचे मुख्य कार्यकारी अधिकारी राजेश गुराणी व त्यांच्या टीमने कार्यक्रमासाठी परिश्रम घेतले. या कार्यक्रमाचे सूत्रसंचालन रश्मी मोहोळकर यांनी केले.