वडिलांच्या निधनाच्या दिवशी दिला पेपर; धनश्री पवारची जिद्द ठरली प्रेरणादायी…

सोलापूर – येथील शरदचंद्र पवार प्रशालेमध्ये इयत्ता दहावीच्या वर्गात शिकत असणाऱ्या धनश्री पवारचे वडील भिकाजी पवार यांचे 20 फेब्रुवारी 2026 रोजी दुःखद निधन झाले होते . घरात वडिलांच्या अंत्यविधीची तयारी सुरू होती. प्रशालेचे मुख्याध्यापक तानाजी माने यांनी धनश्री व तिच्या नातेवाईकांना समजावून सांगत दोन तास अंत्यविधी पुढे ढकलायला लावून धनश्रीला दहावीचा मराठी पेपर देण्यासाठी घेऊन गेले होते. दीड तास धनश्रीने पेपर लिहून ती अर्ध्यातून वडिलांच्या अंत्यविधीला घरी आली होती . आज दहावीचा रिझल्ट लागला. मराठी विषयाला 65 मार्क घेऊन ती उत्तीर्ण झाली आहे. प्रशालेचे मुख्याध्यापक तानाजी माने , शिक्षक राजाराम शितोळे, नितीन मिस्कीन, श्रीराम बरगंडे, आनंद कोळी, श्वेता बाळशंकर, सुलक्षणा भरगंडे, अर्चना शिंदे, स्वाती नागटिळक, मंजुळा संगा, वैशाली सोनटक्के यांनी आज धनश्रीचा घरी जाऊन सत्कार केला व तिला शुभेच्छा दिल्या.
दहावीनंतर व्होकेशनल कोर्स एम एल टी करून स्वतःच्या पायावर उभा राहून वडिलांचे स्वप्न पूर्ण करणार असल्याचे धनश्रीने सांगितले. सदर प्रसंगी धनश्रीची आई सुप्रिया पवार भाऊ विजय पवार व मोठी नुकतीच बारावी उत्तीर्ण झालेली बहीण वैष्णवी इत्यादी उपस्थित होते.