तालुक्यातील भोसे जिल्हा परिषद गटाचे माजी सदस्य आणि समता परिषदेचे नेते बाळासाहेब माळी यांचा दुसऱ्या दिवशीही शोध लागलेला नाही. करकंब पोलीस ठाण्यात माळी यांच्या पत्नीने हरवल्याची तक्रार दाखल केलेली आहे. करकंबचे पोलीस पथक माळी यांचा शोध घेत आहे.
बाळासाहेब माळी यांनी सोमवारी रात्री साडेनऊ वाजता आपण आत्महत्या करीत आहोत, आपणास शोधण्याचा प्रयत्न करू नये अशा प्रकारचा संदेश पत्नी, समाज माध्यम आणि पत्रकारांना पाठवला होता. तेव्हापासून त्यांचा मोबाईल स्विच ऑफ आहे. त्यांचे नातेवाईक आणि पोलीस तपास करीत आहेत. माळी यांनी आपल्या दत्त पेट्रोलियम या पेट्रोल पंपाचा व्यवस्थापक आणि आपल्या पुतण्याने एक कोटी २१ लाख रुपयांची फसवणुक केल्याचा आरोप आपल्या संदेशात केला आहे. तसेच पंपाच्या व्यवस्थापकाने आपण तीन खून केले असल्याची धमकीही दिल्याचा उल्लेख माळी यांच्या संदेशात आहे. त्या अनुषंगाने पोलिस तपास करीत असून पेट्रोल पंपाचा व्यवस्थापक आणि पुतण्याची चौकशी पोलिसानी अद्याप केलेली नाही, असे पोलिस सूत्रांनी सांगितले. मंगळवारी माळी यांच्या पत्नीने करकंब पोलीस ठाण्यात बाळासाहेब माळी हे सोमवारी रात्रीपासून हरवल्याची तक्रार दिली आहे. बाळासाहेब माळी यांच्या सोबत त्यांचे मित्र बंडू भुईरकर आहेत, असे तक्रारीत म्हटले आहे. सोमवारपासून माळी आणि भुईरकर दोघांचेही फोन बंद आहेत. माळी यांचा शोध घेण्यासाठी करकंब पोलीस प्रयत्न करीत आहेत, अशी माहिती करकंबचे सहायक पोलीस निरीक्षक निलेश तारू यांनी दिली.
बाळासाहेब माळी यांचा मोबाईल ते बेपत्ता झाल्यापासून बंदच आहे. त्यांच्या सोबत असलेले त्यांचे मित्र बंडू भुईरकर यांचाही मोबाईल फोन लागत नाही. त्यामुळे मोबाईल लोकेशन तपासण्यात पोलिसांना अडचण येत असावी. कालपासून माळी आणि भुईरकर परिवार - नातेवाईकांसह पोलिसांकडून दोघांचा शोध घेतला जात आहे.
