फडणवीसांनी लिहिलेली जिलेटिन नाट्याची स्क्रिप्ट अंबानींच्या घरासमोरील – नाना पटोले
अंबानींच्या घरासमोर जिलेटिन ठेवण्याच्या घटनेनंतर घडत गेलेला नाट्यक्रम आणि त्याचा शेवट राज्याचे तत्कालीन गृहमंत्री अनिल देशमुख जेलमध्ये जाण्यात झाला. ही सर्व स्क्रिप्ट देवेंद्र फडणवीस यांनी लिहिलेली होती, हे मी तेव्हा म्हटले होते. पण आता ते खरे ठरताना दिसत आहे, असे मत काँग्रेसचे प्रदेशाध्यक्ष नाना पटोले यांनी येथे माध्यमांशी बोलताना व्यक्त केले.
महाराष्ट्राला कलंक लावण्यासाठी, राज्यात सत्ता मिळवण्यासाठी मोदी सरकारने सत्तेचा दुरुपयोग केला, की राज्याच्या भाजप नेत्यांनी हे काम केले. हेसुद्धा आता कळायला लागले आहे. राज्याच्या प्रतिमेला काळिमा फासण्याचे काम भाजपच्या लोकांनी केले. तेव्हा गृहमंत्र्यांनी हे प्रकरण आता स्पष्ट केले पाहिजे. अंबानीच्या घरासमोर जिलेटिन ठेवण्याच्या नाट्याचा खुलासा त्यांनी करावा, ही आमची मागणी असून विधानसभेतही हा प्रश्‍न उपस्थित करणार असल्याचे पटोले यांनी सांगितले.
मी विधानसभा अध्यक्ष असताना एकदा दिल्लीला गेलो होतो. त्यावेळी लोकसभेच्या अध्यक्षांनी तुमच्याकडे परमबीर सिंह नावाचे आयपीएस अधिकारी आहेत, त्यांच्या भ्रष्टाचाराची फाईल आमच्याकडे आली आहे, पीएमओकडेही गेली आहे आणि राज्याच्या मुख्यमंत्र्यांकडेही गेली आहे असे त्यांनी सांगितल्याचे पटोले म्हणाले. आणि त्यानंतर परमबीर सिंह हा खरोखरच भ्रष्ट अधिकारी आहे, हे सिद्ध झाले. परमबीर सिंह यांच्या बाबतीत मुंबई उच्च न्यायालयाने त्यांच्या निलंबनाला विनाकारण मुदतवाढ देण्यात येत असल्याचे निरीक्षण नोंदवले होते. यामध्ये कॅटच्या आदेशाचेही उल्लंघन झाले. उच्च न्यायालयाच्या आदेशाचे पालन सरकारने केले नाही. अँटेलियामध्ये स्फोटके ठेवण्याचे नाट्य पूर्व नियोजित होते असा आरोपही पटोले यांनी केला. त्यावेळी ही फडणवीसांनी ठरवलेली स्क्रिप्ट आहे असे मी विधानसभेतही सांगितले होते. ते आता खरे होताना दिसत आहे. कारण फडणवीसांनी गृहमंत्र्यांवर तो आरोप केला होता. अनिल देशमुखांच्या प्रकरणात १०० कोटींचा हिशोब शेवटपर्यंत लागलाच नाही. ते आणले कुठून, हा प्रश्‍न तेव्हाही निर्माण झाला होता आणि परवा परमबीर सिंह यांच्या बाबतीत देण्यात आलेल्या आदेशात उच्च न्यायालय आणि कॅटच्या आदेशाचेही पालन करण्यात आले नाही. फडणवीसांनी आणि केंद्र सरकारने महाराष्ट्राला बदनाम करण्यासाठी कट केला होता. सरकारने तांत्रिकदृष्ट्या कॅटच्या फेऱ्यातून परमबीर सिंहला बाहेर काढले. त्याला देशमुखांच्या विरोधात प्यादा म्हणून वापरले, असेही पटोले म्हणाले.
