अकोला, अकोट व बार्शीटाकळी कृषी उत्पन्न बाजार समितीचे निकाल शनिवारी जाहीर झाले. अकोला बाजार समितीच्या निवडणुकीत राष्ट्रवादी काँग्रेस, शिवसेना (ठाकरे गट), भाजपचा सहभाग झालेल्या सहकार पॅनलने विजयश्री खेचून आणली तर वंचित बहुजन आघाडीचा धुव्वा उडाला.
अकोल्यात सहकारच्या १५ जागा निवडून आल्या.अन्य तिघांचाही सहकारला पाठिंबा असल्याचे चित्र आहे. अकोटात काँग्रेस, राष्ट्रवादी काँग्रेस, प्रहार जनशक्ति पक्षाच्या नेत्यांनी एकत्र येत स्थापन केलेल्या सहकार पॅनलने मुंसडी मारली. बार्शीटाकळीत काँग्रेस, शिवसेना, भाजपशी निगडीत सहकार नेत्यांनी एकत्र येत गठित केलेल्या शेतकरी संघर्ष पॅनलने झेंडा फडकवला. राज्यात महाविकास आघाडी (मविआ) विरूद्ध भाजप असा सामना रोज रंगत असला तरी बाजार समितीच्या निवडणुकीत मविआ व भाजपने सोयीची आघाडी केल्याचे दिसून आले.
पुढेही याच पॅटर्नची पुनरावृत्ती
कृषी उत्पन्न बाजार समितीची निवडणूक महाविकास आघाडीतील राष्ट्रवादी काँग्रेस, शिवसेना( ठाकरे गट) आणि भाजप नेत्यांनी एकत्र येत सहकार पॅनलच्या माध्यमातून लढली. परिणामी ग्रामपंचायत व स्थानिक स्वराज्य संस्थांमध्ये दबदबा असल्यानंतरही वंचित बहुजन आघाडीला पराभवाला सामोरे जावे लागले. स्थानिक स्वराज्य संस्थांच्याही निवडणुकीत सर्व मुख्य पक्ष एकत्र आल्यासच वंचित बहुजन आघाडीचा पराभव शक्य आहे, असा संदेश या निवडणुकीतून मिळाला असून, याच पॅटर्नची पुनरावृत्ती आगामी निवडणुकीत होईल काय, हे पाहणे औत्सुक्याचे राहणार आहे.
