सोलापुरात एम आय एम चे इम्तियाज जलील व शौकत पठाण यांच्याकडून तिऱ्हे गावात जेवणाचे साहित्य वाटप…
सोलापूर शहरात झालेल्या मुसळधार पावसामुळे सीना नदीला मोठा पूर आला. या पुरामुळे नदीकाठच्या अनेक गावांमध्ये पाणी शिरून घरांचे, शेतीचे तसेच जनावरांचे मोठे नुकसान झाले. गावोगावी नागरिकांचे जनजीवन विस्कळीत झाले असून अन्न-पाण्याची मोठी टंचाई निर्माण झाली आहे. नागरिकांना निवाऱ्यासाठीही हालअपेष्टा सहन कराव्या लागत आहेत.
या गंभीर परिस्थितीत मदतीसाठी एमआयएमचे महाराष्ट्र प्रदेशाध्यक्ष व माजी खासदार इम्तियाज जलील यांनी सोलापूर दौरा केला. त्यांच्या सोबत एमआयएम पक्षाचे जिल्हाध्यक्ष शौकत पठाण यांनीही पूरग्रस्त भागातील पाहणी करून नागरिकांना दिलासा दिला.
तीऱ्हे या गावाला भेट देऊन पूरग्रस्तांना जेवणाचे साहित्य, धान्य व आवश्यक वस्तूंचे वाटप करण्यात आले. स्थानिक नागरिकांशी संवाद साधून त्यांच्या अडचणी समजून घेतल्या. या वेळी गावकऱ्यांनी सांगितले की अचानक आलेल्या पुरामुळे घरात पाणी शिरले, घरातील सामान वाहून गेले आणि मुला-बाळांसह अनेक जणांना सुरक्षित स्थळी हलवावे लागले.
इम्तियाज जलील यांनी सांगितले की, “पूरग्रस्तांच्या मदतीसाठी एमआयएम पक्ष सदैव पुढाकार घेईल. लोकांना संकटातून बाहेर काढण्यासाठी सरकारने तातडीने मदतकार्य करावे. आमच्या पातळीवरून जास्तीत जास्त मदत पोहोचवण्याचा प्रयत्न केला जाईल.”
दरम्यान, शौकत पठाण यांनीही पूरग्रस्तांना विश्वास दिला की, पक्षाच्या वतीने सातत्याने गावोगावी मदतीचे साहित्य पुरवले जाईल.
पूरग्रस्त गावात नागरिकांना जेवणाचे साहित्य मिळाल्याने थोडासा दिलासा मिळाला असून स्थानिकांनी एमआयएमच्या या मदतीबद्दल कृतज्ञता व्यक्त केली….
