सोलापूर जिल्ह्यात हळहळ! उजनी कालव्यात बुडून दहावीच्या विद्यार्थ्याचा मृत्यू; वसतिगृहाच्या कारभारावर कुटुंबीयांचा तीव्र संताप..!
पंढरपूर तालुक्यातील केसकरवाडी येथे दुर्दैवी घटना: उजनी उजव्या कालव्यात बुडून दहावीच्या विद्यार्थ्याचा मृत्यू
पंढरपूर तालुक्यातील केसकरवाडी येथे उजनीच्या उजव्या कालव्यात बुडून दहावीत शिकणाऱ्या एका विद्यार्थ्याचा दुर्दैवी अंत झाल्याची धक्कादायक घटना घडली आहे. समर्थ नागनाथ बोबडे (वय १६) असे या मृत विद्यार्थ्याचे नाव आहे.
समर्थ हा केसकरवाडी येथील ‘शिवराम केसकर मागासवर्गीय निवासी वसतिगृहात’ राहून आपले शिक्षण पूर्ण करत होता. या घटनेमुळे संपूर्ण परिसरात तीव्र हळहळ व्यक्त केली जात असून, निवासी वसतिगृहातील विद्यार्थ्यांच्या सुरक्षिततेचा मुद्दा पुन्हा एकदा गंभीरपणे ऐरणीवर आला आहे.
नेमकी घटना काय घडली? मिळालेल्या माहितीनुसार, घटनेच्या दिवशी समर्थ आपल्या काही सहकाऱ्यांसोबत वसतिगृहाजवळील उजनी उजव्या कालव्यावर कपडे धुण्यासाठी गेला होता. कपडे धुवत असताना अचानक त्याचा पाय घसरला आणि तो कालव्याच्या वेगवान प्रवाहात फेकला गेला. पाण्याचा अंदाज न आल्याने समर्थ पाण्याच्या ओघात वाहून जाऊ लागला. सोबत असलेल्या मित्रांनी तात्काळ आरडाओरड करत मदतीचा प्रयत्न केला; मात्र पाण्याचा प्रवाह प्रचंड असल्याने त्याला वाचवण्यात अपयश आले.
वसतिगृह प्रशासनाच्या कारभारावर पालकांचा तीव्र संताप या दुर्घटनेनंतर समर्थचे वडील नागनाथ प्रभाकर बोबडे यांनी वसतिगृह प्रशासनाच्या निष्काळजीपणावर गंभीर सवाल उपस्थित केले आहेत. “निवासी वसतिगृहात राहणारा अल्पवयीन मुलगा बाहेर कालव्यावर जाईपर्यंत सुरक्षा रक्षक आणि जबाबदार कर्मचाऱ्यांचे याकडे लक्ष कसे नव्हते?” असा संतप्त सवाल त्यांनी केला आहे.
या संपूर्ण प्रकरणाची सखोल आणि निष्पक्ष चौकशी करण्यात यावी, तसेच वसतिगृह चालक व निष्काळजीपणास जबाबदार असलेल्या कर्मचाऱ्यांवर तात्काळ गुन्हे दाखल करण्यात यावेत, अशी ठाम मागणी नागनाथ बोबडे यांनी केली आहे. समर्थच्या अकाली जाण्याने बोबडे कुटुंबावर दुःखाचा डोंगर कोसळला असून, आता पोलीस व संबंधित प्रशासन या प्रकरणावर काय कारवाई करते, याकडे सर्वांचे लक्ष लागले आहे…
