खो-खो स्पर्धेत धाराशिव-ठाणे अंतिम फेरीत…

राज्य निमंत्रित महिलांच्या खो खो स्पर्धेत ठाण्याचे ज्ञानविकास स्पोर्ट्स फाउंडेशन व धाराशिवचे छत्रपती व्यायाम प्रसारक मंडळाने अंतिम फेरीत प्रवेश केला. कबड्डीमध्ये स्वराज्य स्पोर्ट्स क्लब मुंबई उपनगर, आनंदवन महिला संघ गंगाखेड (परभणी), बारामती स्पोर्ट्स क्लब व प्रोग्रेस अकॅडमी सांगली या संघाने उपांत्य फेरीत प्रवेश केला.

नार्थकोट प्रशालेच्या मैदानावर हिंदू धर्मरक्षिणी पुण्यश्लोक अहिल्यादेवी होळकर मध्यवर्ती महामंडळ यांच्या वतीने ही स्पर्धा सोलापूर जिल्हा कबड्डी व खो-खो असोसिएशन आणि उत्कर्ष क्रीडा मंडळ यांच्या सहकार्याने आयोजित केली आहे.

खो-खो स्पर्धेतील उपांत्य सामन्यात दिव्या गायकवाड (४.००, २. ४० मि. व ३ गुण), धनश्री कंक ( १.५० मि. व ४ गुण) यांच्या अष्टपैलू खेळीमुळे ज्ञानविकास स्पोर्ट्स फाउंडेशनने ठाण्याच्याच शिवभक्त क्रीडा मंडळाचा १५-१३ असा पराभव केला. मध्यंतराची ७-४ ही आघाडीच त्यांना विजय मिळवून दिली. शिवभक्तकडून रेश्मा राठोड (२.००, २. १० मि. व २ गुण ) हिची लढत अपुरी ठरली.
दुसऱ्या उपांत्य सामन्यात धाराशिवने रत्नागिरीच्या आर्यन स्पोर्ट्स क्लबवर ११-६ असा एक डाव राखून दणदणीत विजय मिळवला. अश्विनी शिंदे (३.५० मि. व ३ गुण ) व सुहानी धोत्री (४ गुण व १. २० नाबाद ) यांची अष्टपैलू खेळी संघास सहज विजय मिळवून दिली. रत्नागिरीकडून पायल पवार (१. ०० मि. व २ गुण) हिचे एकाकी प्रयत्न अपुरे पडले

कबड्डीच्या साखळी सामन्यात
​​बारामतीने वैष्णवी क्लब परभणी ५३-२२ अशी सहज मात केली यात ​ निकिता लंगोटे व वैष्णवी चव्हाण यांच्या चढाई उत्कृष्ट झाल्या.
​दुसऱ्या सामन्यात आनंदवन महिला संघ परभणीने ​विश्वशांती क्रीडा मंडळ ३७-१२ असा विजय मिळविला. यात ​​कीर्ती ढीगोळे, लावण्य वाडेकर, आसफिया शेख व यशस्वी इंगोले यांच्या चढाया व शितल मगळे, कावेरी आडे यांच्या पकडी प्रेक्षणीय ठरल्या.
अन्य एका सामन्यात निकिता कवडे व कोमल महाजन यांच्या चढायामुळे बारामती अकॅडमीने नाशिक महिला संघास ५३-२८ असे नमविले.
​स्वराज्य स्पोर्ट्स क्लबने सोलापूर महिला संघास ५१-२५ असे हरविले. यात याशिका पुजारी, प्रज्ञा माने, संस्कृती माने यांच्या चढाया आणि सायली सपकाळ, सई ताम्हणकर व श्रद्धा अचलेरी यांच्या पकडी उल्लेखनीय ठरल्या. दुसऱ्या सामन्यात साकिब रंगरेज (चढाई) व अक्षदा पादव (पकड) यांच्या खेळीमुळे स्वराज्य स्पोर्ट्स क्लबने प्रोग्रेसिव्ह स्पोर्ट्स क्लब ४०-२१ ​नमविले.

अन्य निकाल :क्रांतीजोत क्रीडा मंडळ विजयी विरुध्द सोलापूर महिला संघ ६१-२३.
​​आनंदवन महिला संघ परभणी विजयी विरुध्द नाशिक महिला संघ ४५-३६.

असे होणार उपांत्य सामने
स्वराज्य स्पोर्ट्स क्लब मुंबई उपनगर विरुद्ध आनंदवन महिला संघ गंगाखेड परभणी. बारामती स्पोर्ट्स अकॅडमी बारामती विरुद्ध प्रोग्रेस अकॅडमी सांगली.