कामतीत अल्लाउद्दीन बाबा उरुसाची जय्यत तयारी; 7-8 मे रोजी भक्तिभावाचा उत्सव…
मोहोळ तालुक्यातील कामती बु. येथे अल्लाउद्दीन बाबा उरुस ७ व ८ मे रोजी मोठ्या उत्साहात साजरा होणार असून गावात सध्या तयारीचा माहोल रंगला आहे. बौद्ध पौर्णिमेनंतर येणाऱ्या गुरुवार-शुक्रवारी हा उरुस भरविण्याची परंपरा असून, यंदाही भाविकांच्या उपस्थितीत विविध धार्मिक कार्यक्रमांचे आयोजन करण्यात आले आहे…
अल्लाउद्दीन बाबा हे हिंदू व मुस्लीम बांधवांचे समान श्रद्धास्थान मानले जात असल्याने या उरुसाला विशेष महत्त्व आहे. सर्वधर्मीय ऐक्याचे प्रतीक ठरलेला हा उत्सव दरवर्षी मोठ्या भक्तिभावात आणि उत्साहात पार पडतो.
उरुसाच्या पहिल्या दिवशी, ७ मे रोजी गावातून पारंपरिक संदल मिरवणूक काढण्यात येणार आहे. ढोल-ताशांच्या गजरात आणि भक्तिमय वातावरणात निघणाऱ्या या मिरवणुकीत परिसरातील भाविक मोठ्या संख्येने सहभागी होतात.
८ मे रोजी कामती गावची यात्रा भरविण्यात येणार असून विविध धार्मिक व पारंपरिक कार्यक्रमांची रेलचेल पाहायला मिळणार आहे. यावेळी गावात उत्सवी वातावरण निर्माण होऊन भाविकांची मोठी गर्दी अपेक्षित आहे.
उरुसानिमित्त १० मे रोजी जंगी कुस्ती स्पर्धांचे आयोजन करण्यात आले असून दुपारी २ ते ४ या वेळेत कुस्त्यांचे सामने रंगणार आहेत. या सर्व कार्यक्रमांना उपस्थित राहण्याचे आवाहन यात्रा समितीचे अध्यक्ष अफसर मुजावर, सचिव समीर मुजावर आणि नामदेव खराडे वस्ताद यांनी केले आहे.
